Aftur til Hollands

Nú er frí mitt hér á Íslandi á enda runnið. Flugið klukkan 7:50. Það er nú búið að vera afskaplega notalegt hérna á Íslandi og verður gott að koma aftur. Ég þarf ekki að bíða lengi því næsta heimferð er ætluð þann 21. febrúar, ætla að eyða vorfríinu í heimahögum. Aftur kem ég svo til landsins þann 10. maí í tæka tíð fyrir einleik með Sinfóníuhljómsveit Áhugamanna. 

Skólinn byrjar á fullu um leið og ég kem út. Reyndar byrjaði hann í dag, mánudag, en ég tók mér það bessaleyfi að framlengja fríið mitt um 2 daga. Á miðvikudag er fullur skóladagur og á fimmtudaginn verður rennsli á tækniprófinu sem mun fara fram þann 24. janúar. Á föstudag er tími með Ivan og síðar um daginn verð ég að vera með fyrirlestur um eitthvað sögulegt sem tengist básúnunni. Ég ætla að fjalla um muninn á notkun Schubert og Beethoven á básúnum. 

Schubert notar draglúðurinn á töluvert áhugaverðari máta og er hann alger frumkvöðull í nettri skrifmennsku fyrir básúnur í sinfónískum tónbókmenntum.

Vekjaraklukkan mín mun hringja eftir rétt rúma 4 tíma þannig að ég held það sé tilvalið að reyna að sofna smá, og helst sem fyrst. 

Næsta blogg verður skrifað í Diemen.