Íbúfen

Ég er búinn að bryðja íbúfen reglulega síðustu daga. Ástæðan er þessi endemis endajaxl sem er eitthvað að ibba gogg. Ég hélt í gærkvöldi að þetta væri búið en annað kom á daginn. Ég gat ekki sofið lengur en í rúman klukkutíma. Ég myndi nú taka sterkar verkjatöflur en ég á þær ekki til og líka verð ég að vera með kollinn í lagi. Hef þurft að greina ansi flókna tónsmíð upp á síðkastið.

Það er ætlun mín að taka þátt í Christian Lindberg básúnukeppninni sem verður haldin í Apríl á næsta ári. Með Christian í dómnefndinni eru Joe Alessi, Michel Bequet og Jörgen van Rijen auk 2ja lítt þekktari básúnuleikara. Helstu stjörnurnar verða semsagt allar í dómnefndinni. Það vantar bara Alain Trudel og þá væri þetta fullkomnað.

Mér finnst fínt að vera búinn að setja mér svona markmið. Markmiðið er að í janúar verði ég búinn að ná þeim stykkjum sem eru í fyrstu tveimur umferðunum í keppninni. Ef það tekst ekki þá hætti ég við þáttökuna og fer bara að hlusta í staðinn. Ég ætla nota sumarið mjög vel í æfingar. Reyna eftir megni að halda rútínunni sem ég er búinn að koma upp hér. Vinna í sumar gæti samt komið í veg fyrir það.

Nú fer mikil orka í að leggja lokahönd á undirbúninginn fyrir prófið mitt sem verður 30. maí. Undanfarnar vikur eru búnar að vera skelfilegar fyrir mig. Eftir frábæra daga á Íslandi þar sem ég kom miklu í verk lagðist ég í flensu. Svo datt ég af hjólinu og nú þessi tannavandræði. Ég er nú samt búinn að ná öllum verkunum þannig að nú er bara að koma sér í gott form, andlega og líkamlega.

Það er reyndar eitt tæknilegt atriði sem ég er ekki nógu öruggur á og það er trilla sem er á háa a-inu undir lok BACH fantasíunnar. Ég get gert trilluna en ekki eins og ég vil hafa hana.

Ég ætla annaðhvort að fara út að skokka eða í langan göngutúr núna í morgunsárið. Held að göngutúrinn verði ofan á. Ég er ekki með nógu góðar lappir fyrir skokk, allavega ekki á malbiki.

Það var ekki meira í bili,